筆者明白，近日山野意外頻生，而且炎夏迫近，share路線都要有好多考慮因素。不過呢條路線絕對適合係呢個時節放心share，因為全石屎路，難度低兼且對山野影響有限，終點更加係涼浸浸海灘，適合大班朋友一齊投奔初夏！
起點位於小西灣藍灣半島旁邊公園（過海隧巴118／606號可達），只要行出海旁向東走，經過球場後，好快喺公園內搵到入山樓梯，見到寫住係「龍躍徑」入口就對了。
龍躍徑係平坦上斜馬路，輕鬆無難度，約15分鐘走完，抵達橫亙嘅歌連臣角道之後，接上砵甸乍山郊遊徑，亦進入石澳郊野公園範圍。注意呢度（歌連臣角道同砵甸乍山郊遊徑交界處）係著名野豬出沒處，需要提高警覺，一旦遇上，最重要係保持冷靜，而且唔好嚇親佢哋！
完成龍躍徑來到歌連臣角道，景致開揚舒暢
砵甸乍山郊遊徑一開始就要不停攀升約80米海拔的全樓梯，不過整段路況大致係一上一落，亦即上完呢段之後就全落山，好快就辛苦完。落山段梯級邊塗上藍色醒目提示，頗為特別，雖然人工化但算係襯返前方無盡海景，算係無咁礙眼啦。
仿如通往大海的藍色階梯
落山段景觀睇到目不暇給，向左望可見連接陸地的清水灣半島，中間最明顯的大島是東龍洲，遠處可見螺洲與蒲台島，右邊海岸線近至遠依次為大浪灣、石澳半島和看得見崖邊橙色屋頂的鶴咀，中間更可俯瞰坐擁環迴海景嘅整個歌連臣角懲教所，景色比起走入深山的龍脊後段開揚得多。（必須做足防曬和戴帽啊！）
臨近大浪灣，已經聽到海灘傳來不絕的歡呼嬉笑聲，實在令人蠢蠢欲動落水玩埋一份，不過五月才剛開始，大浪灣已經迫爆！沙灘後方有唔少士多，提供絕對可以食飽嘅豐富美食。行完成段小西灣至大浪灣（全程3.5km）正常不超過一小時，嚟到海灘再食嘢玩水，就真係舒舒服服過一Day。
沿這條路抵達大浪灣沙灘，會途經崖邊的遠古大浪灣石刻，值得停下腳步窺探香港歷史
如果假期+好天氣前來，要做好排長龍搭車返市區嘅準備，排隊一兩個鐘頭係等閒。所以假如時間同體力充分，原路行返小西灣絕對有可能更快逃離！甚至係大浪灣休息過後逆行龍脊，就可以串連成長途之旅。
